Ég heyri svo vel, ég heyri snjóinn snjóa

Ég heyri svo vel, ég heyri grasið gróa.

Ég heyri svo vel, ég heyri orminn mjóa, heyri hárið vaxa, heyri neglurnar lengjast,

heyri hjartað slá.

Þú finnur það vel, allt færist nær þér.

Þú finnur það vel, þú kemur nær mér.

Þú finnur það vel, allt fæðist í þér,

andlitin lifna og húsin dansa

og vindurinn hlær.

                Ólafur Haukur Símonarson

Ef að nú hjá pabba, einn fimmeyring ég fengi

fjarskalega hrifin og glöð ég yrði þá.

Ég klappa skyldi pabba og kyssa vel og lengi

og kaupa síðan allt, sem mig langar til að fá.

Fyrst kaupi ég mér brúðu, sem leggur aftur augun

og armbandsúrið fína af fallegustu gerð.

Og af því hvað hún mamma er orðin þreytt á taugum

þá ætla ég að kaupa bíl í hverja sendiferð.

Hjólhest og járnbraut ég ætla að gefa Geira

gríðarstóra flugvél ég kaupi fyrir Finn.

Svo kaupi ég mér döðlur og súkkulaði og fleira

síðan skal ég gefa pabba allan afganginn.

                Felix Körling / ók höf.

Höfuð, herðar, hné og tær, hné og tær.

Höfuð, herðar, hné og tær, hné og tær.

Augu, eyru, munnur og nef.

Höfuð, herðar, hné og tær, hné og tær.

                Bellmann

Við lítinn vog, í litlum bæ
er lítið hús, lítið hús.
Í leyni inni í lágum vegg
er lítil mús, lítil mús.
Um litlar stofur læðst hæg
og lítil hjón,
því lágvaxin er litla Gunna
og litli Jón.

Þau eiga lágt og lítið borð
og lítinn disk, lítinn disk
og litla seið og lítinn hníf
og lítinn fisk, lítinn fisk
og lítið kaffi, lítið brauð
og lítil grjón.
Því lítið borða litla Gunna
og litli Jón.

Þau eiga bæði létt og lítil
leyndarmál, leyndarmál,
og lífið gaf þeim lítinn heila
og litla sál, litla sál.
Þau miða allt sitt litla líf
við lítinn bæ
og lágan himin, litla jörð
og lygnan sæ.

Þau höfðu lengi litla von
um lítil börn, lítil börn,
sem léku sér með lítil skip
við litla tjörn, litla tjörn,
en loksins sveik sú litla von
þau litlu flón,
og lítið elskar litla Gunna
hann litla Jón.

Rétt við ruslabing, ryðgað dót í kring,

brotið gler og beyglað pjátur,

Mikki frændi minn, malinn fyllir sinn.

Við það gerist karlinn kátur.

viðlag:

Lífið hljóðlátt aldrei er

þar sem aldinn Mikki fer

Gamla fötu fann

og nú hafrar hann

botninn eins og best hann kann.

Flytur fagran óð fuglahjörðin góð

yfir hauginn, holt og grundir,

einnig út á sjó, allt í steríó

Mikki rámur raular undir.

Viðlag.

                danskt þjóðlag

Gult fyrir sól, grænt fyrir líf,

grátt fyrir þá sem reka menn út í stríð.

Hvítt fyrir börn, sem biðja um frið

biðja þess eins að fá að lifa' eins og við.

Er ekki jörðin fyrir alla?

Taktu þér blað, málaðu' á það

mynd þar sem að allir eiga öruggan stað.

Augu svo blá, hjörtu sem slá

hendur sem fegnar halda frelsinu á.

Þá verður jörðin fyrir alla. 

                Olga Guðrún Árnadóttir

Við skýin felum ekki sólina af illkvittni

við skýin erum bara að kíkja á leiki mannanna.

Við skýin sjáum ykkur hlaupa oooooops

í rokinu, klædd gulum, rauðum, grænum, bláum regnkápum

eins og regnbogi meistarans, regnbogi meistarans

við skýin erum bara grá, bara grá

á morgun kemur sólin, hvar verðum við skýin þá. 

                Egill Ólafsson

                Sigurður Bjóla

                Valgeir Guðjónsson

Ég finn það ofan í maga oohó

ég finn það fram í hendur oohó

ég finn það niður í fætur oohó

ég finn það upp í höfuð oohó.

:,: Ég finn það hér og hér og hér og hér

og hér og hér hvað ég er glöð hér inn í mér :,:

Það er leikur að læra,

leikur sá er mér kær,

að vita meira og meira,

meira í dag en í gær.

Bjallan hringir, við höldum

heim úr skólanum glöð,

prúð og frjálsleg í fasi,

fram nú allir í röð.

Það má ekki pissa bak við hurð

og ekki henda grjóti oní skurð

ekki fara í bæinn

og kaupa popp og tyggjó

og ekki nota skrúfjárn fyrir sleikjó.

Það má ekki vaða út í sjó

og ekki fylla húfuna af snjó

ekki tína blómin

sem eru úti í beði

og ekki segja ráddi heldur réði.

Þetta fullorðna fólk er svo skrýtið

það er alltaf að skamma mann

þó maður geri ekki neitt

það er alltaf að skamma mann.

Það má ekki skoða lítinn kall

og ekki gefa ketti drullumall

ekki skjóta pabba

með byssunni frá ömmu

og ekki tína orma handa mömmu.

Það má ekki hjóla inn í búð

og ekki gefa litla bróður snúð

og ekki fara að hlæja

þó einhver sé að detta

og ekki gera hitt og ekki þetta.

Þetta fullorðna fólk er svo skrýtið….

                Sveinbjörn I Baldvinsson